Waxaa caawa dagan goobihii lagu dagaalamay maanta deegaanka Xeraale ee gobolka Galgaduud, dagaalkii maanta ayaa u dhaxeeyey ciidamada Ahlu sunna iyo ciidamada deegaanka, waxaana daba socdaa dagaal maalmahaan ka dhacayey halkaasi, waxaa muuqata ciidamada deegaanku ay iska difaaceen weerarka ciidamada Ahlu sunna.
Dagaalka maanta ayaa inta la xaqiijiyey waxaa ku geeriyooday 7 ruux oo labada dhinac ah, iyo dhaawaca 18 kale. waxaana laga cabsi qabaa in dagaal dib u qarxo beri subax, maadaama aysan jiran cid kala dhexgashay labadan ciidan. dhaawacyada ayaa la geeyey Cadaado, Cabudwaaq, Dhuusamareeb iyo Guriceel.
Dadka rayidka ayaa horey uga barakacay deegaanka, iyagoo ku dhibaataysan duleeda iyo xerooyin barakac, burbur xooggan ayaa soo gaaray magaalada, goobihii ganacsiga iyo adeega bulshada ayaa xiran. maamulka Galmudug iyo dowlad federaalka ayaa ka aamusan dagaallkan muddada dheer ka socda Xeraale.
