Sawirro: Bandhiga Carwada Caalamiga ah ee Buugaagta oo maanta ka furmay Muqdisho

Arimaha Bulshada Wararka Maanta WAXBARASHADA

Bandhiga Carwada Caalamiga ah ee Buugaagta Muqdisho ayaa maanta ka furmay magaalada Muqdisho , Carwadan ayaa la qabanayaa sanadkii labaad  waxaana ka soo qeyb galay qorayaal Soomaali iyo Ajnabi isugu jira oo ka kala yimid gudaha dalka iyo dibadaba, Carwadan Buugaagta  ayaa socon doontaa saddex maalmood  17,18,19 bishan.

Maxamed Diini oo ah Madaxa Carwada Buugaagta Muqdisho ayaa ka hadlay ujeedada bandhigan iyo waxyaabaha uu xambaarsan yahay, isagoo xusay in bandhigan uu yahay mid aqoon iyo cilmi lagu kororsan doono, isagoo xusay in Soomaalida oo dhan lala wadaagato wanaag, cilmi iyo aqoon.

Waxaa uu u mahad celiyay dhamaan dadka ka qeyb galaya bandhigan ee ka timid dhulalka Soomaaliyeed, waxaa uu xusay in bandhigan uu tusaale u noqon doono Soomaaliyada cusub mustaqbalkeeda.

Qorayaasha bandhigan lagu casuumay waxaa ka mid ah Faaraxa Qarre oo dhowr buugaag qoray, waxaana uu soo bandhigay buugiisa waaya arag, sidoo kale waxaa ku jira Wariyaha rug cadaaga ah ee horay ugu soo shaqeeyay Laanta afka Soomaaliga ee BBC-da Yuusuf Xasan, Sidoo kale dadka buugaagta qoray ee bandhigan buugaagtooda lagu soo bandhigayo waxaa ka mid ah Axmed Faarax Idaajaa.

Wariyihii hore ee BBC Andrew Harding ayaa ka mid ah qorayaasha martida ku ah bandhigan, wuxuuna qoray buug loogu magac daray The Mayor of Mogadishu (Duqa Magaalada Muqdisho).

Maxamed Xaaji Ingiriis oo ka mid ah aqoonyahanada Soomaaliyeed ayaa buug uu ka qoray xaalada Soomaaliya oo magaciisa yahay Qarankii is dal-dalay oo ku qoran afka English.

Sidoo kale waxaa buugaagta la soo bandhigayo ka mid ah kuwa ka hadlaya dhaqanka, suugaanta, qoyska, nolosha, jaceylka iyo kuwa kale.

Dhamaan dadka ka qeyb galay ayaa ahaa kuwo aad ugu hamuun qabay inay arkaan bandhigan noocaan oo kale ah oo lagu kororsanayo aqoon iyo cilmi, waxaana buugaagta madasha lagu soo bandhigay ku jiray kuwa laga qoray Madaxweynayaal, halgamayaal soo maray adduunka iyo shaqsiyaad kale oo caan ahaa.

DSC_0002 DSC_0007 DSC_0013 DSC_0049 DSC_0054 DSC_0057 DSC_0082 DSC_0096 DSC_1033 DSC_1045

3 thoughts on “Sawirro: Bandhiga Carwada Caalamiga ah ee Buugaagta oo maanta ka furmay Muqdisho

Comments are closed.