Somaliland oo Xubin ku leh Hay’adda Batroolka Soomaaliya

Dhaqaalaha Wararka Maanta

Hay’adda Batroolka Soomaaliya (SPA) ayaa magacawday lix agaasimeyaal madax-bannaan oo ka mid noqon doona Guddiga hay’adda.

Agaasimayaasha cusub ayaa kala matalidoona dowlad goboleedyada, gobolka Banaadir iyo dowladda federalka Soomaaliya.

Xubnaha guddiga waxaa ka mid ah Caasha Cismaan Axmed oo ah guddoomiye ku-xigeen, oo mataleysa Maamulka Gobolka Banaadir, Ibraahim Axmed Layte oo matalaya Hirshabeelle, Cabdulqaadir Aadan Maxamuud oo matalaya Galmudug, Ibraahim Cabdulqaadir Maxamed oo matalaya Koonfur Galbeed.

Waxaa sidoo kale ka mid ah Axmed Xaaji Cabdi oo matalaya Dowlad Goboleedka Jubbaland, Cabdixaafid Cali Dirir oo isna la sheegay in uu matalayo Somaliland iyo Mahad Maxamed Xasan oo ka socda Dowlada Federaalka.

Gudiga cusub ayaa loo xilsaaray kor u qaadida warshadaha saliida iyo gaaska iyo in ay hubiyaan in sharciyadda horumarinta maaliyaddeed ee lasoo saaray ay la jaanqaadayaan mabaadi’da sinnaanta, furfurnaanta, la xisaabtanka, daah furnaanta iyo takoor la’aanta danaha dadka Soomaaliyeed oo dhan.

Maareeyaha Hay’adda Batroolka Soomaaliya Ibraahim Cali Xuseen ayaa yidhi,” “guddigan wuxuu hubin doonaa in dhamaan maamulada xubnaha ka ah ay awoodaan inay gacan ka geystaan qaabeynta horumarka warshadaha ayna soo jiitaan maalgashi caalami ah si loo kordhiyo soo kabashada dhaqaalaha keydka saliida iyo gaaska Soomaaliya.”

Xigasho: Hiiraan.

Aragtidaada ka dhiibo