Magaalada Dusmareeb Caasimadda Dowlad goboleedka Galmudug waxaa xalay gaaray saraakiil ka socotay ciidanka sida gaara ah u tababar ee Danab xoogga dalka qeybta Galmudug, Waxaana ku wehliyey ciidanka Sida gaarka u tababar ee Puntland PSF. Ciidamadan ayaa shalay kasoo baxay Saldhigooda Waqooyiga Galkacyo ayaa xalay ka gudbay Magaalada Cadaado.
Maanta ayaa garoonka diyaaradah Dusmareeb waxaa kasoo dagay saraakiil Cadaan ah oo ka socday Shirka Bancroft oo shirkad tababarka siisa ciidamada gaarka ah ee Soomaaliya. Saraakiishan ayaa kulan la qaatay Madaxa Xukuumadda Galmudug Sheekh Shaakir iyo masuuliyiin kale.
Ciidanka Danab qeybta Galmudug waxaa taliye u ah G/Sare Qooje, oo horey u soo noqday Taliyihii Daraawiishta Galmudug. Sidoo kale Galmudug waxaa magacaaban Taliyaha Unugga la dagaalanka Argagixisada oo uu ku magacaaban yahay Xildhibaan Faysal Gacamey oo ka tirsan Barlamaanka Galmudug.
Sidoo kale Saraakiishan ayaa la filayaa in ay beri oo Jimce ah soo gaaraan Magaalada Cadaado, iyagoo kulan la qaadan doona Masuuliyiinta iyo waxgaradka Cadaado. Shirkadda Bancroft ayaa doonaysa in ay isku fidiso deegaanada Galmudug.
Ciidanka Danabka qeybta Galmudug oo tirsi ahaan u dhow 100 Askari oo ku qalabeysan gawaarida GMC ayaa la filayaa in gaarsiiyo ilaa 500 Askari, iyagoo la filayo in ay dhawaan bilaabaan Howlgalo ay ka fuliyaan deegaanada Galmudug. Saraakiisha Bancroft iyo Danab ayaa horey u tagay koofurta Mudug gaar ahaan Magaalada Hobyo.
