Waxaa galabta lasoo gabangabeeyey baaritaankii gaadiidkii Kunteenarada siday, gaadiidkan ayaa lagu baaray xerada tababarada ciidamada Guuleed Duleedka Cadaado.
Guddi Saraakiil ciidan ah ayaa howshan horkacayey, waxaana baaritaanku bilowday abaara 11:00 barqanimo, wuxuuna soo gabangaboobay galabta 5:00 galanimo.
Gaadiidkan oo gaarayey 6 gaari, ayaa siday min hal kunteenar oo nuuca Xafiis iyo guryo loo adeegsado. Labo ka mid ah gaadiidkan ayaa laga helay agab isugu jira Silig, Box-yada Difaaca xeryada ciidamada iyo Alwaax. Halka Afarta Gaari ee kale ay sideen Kunteenaro faaruq ah.
Ilaa hadda ma cadda cidda iska leh agabkan, darawalada gaadiidkan ayaa sheegay in ay Xamuulkan kasoo qaadeen Jabuuti ayna u socdaan Muqdisho. Gaadiidkan ayaa la filayaa in saacadaha soo socda la fasaxo.
Maxaa dib u dhigay Baaritaanka Gaadiidka?
- Qalabka saaran Gaadiidkan oo aysan jirin cid si rasmi ah u sheegtay.
- Dacaayad ah in gaadiidkaan hub sidaan oo ku faaftay bulshada dhaxdeeda, waana midda adkeysay in la baaro gaadiidkan. Dacaayadan ayaa waxaa fidiyey dad doonayey in Fowdo ka dhalato arintaan.
Dadka deegaanka ayaa soo dhaweeyey in si nabad ah kusoo dhamaatay baaritaanka gaadiidkan.
