Wasiir ku xigeynkii wasaarada Qorsheynta iyo iskaashiga caalamiga ah ee dowlad goboleedka Galmudug, ahaana sii hayaha xilka wasiirka wasaaradaasi C/qaadir Maxamed Aadan(Cabdul) oo lahadlay saxaafadda gudaha ayaa sheegay inuu iska casilay xilkii uu hayey.
Wasiirkan ayaa sheegay in kadib markii uu arkay in aysan jirin horusocod maamulka uu go’aansaday inuu isaga tago xilka, madaama horey wasaaradda qorsheynta uga tageen wasiirkii wasaaradaas Maxamed Cilmi Afrax iyo wasiiru dowlihii wasaaradaas Cabdiraxmaan Maxamed Cismaan.
HALKAAN KA AQRISO WARQADDA IS CASILAADDA WASIIRKA
Tani ayaa ka dhigan in wasaaradaan uu xil ahaan ugu sareeyo agaasimaha guud, iyadoo ay dhammaan ka tageen masuuliyiintii ka sareysay, Xukuumadda Galmudug ayaa noqotay tusbax xariga laga furay, waxaana wasiirada is casilay kor u dhaafayaan ilaa 10 wasiir.
Dowlad goboleedka Galmudug ayaa wajahaysa khilaaf siyaasadeed iyo wax qabad la’aan, waxaana muuqata in ay u baahan tahay badbaadin iyo daba qabasho.
