Maxaa kasoo baxay kulamadii Dhuusamareeb?

Wararka Galmudug Wararka Maanta

Wasiirka Arimaha Gudaha Soomaaliya Eng. Cabdi Maxamed Sabriye ayaa maanta gaaray magaalada Dhuusamareeb caasimadda Galmudug, waxaana garoonka diyaaradaha kusoo dhaweeyey Gudoomiyaha Dhuusamareeb, wasiiro, iyo qeybaha bulshada.

Sabriye ayaa intaas kadib loo galbiyey Xarunta Gobolka oo uu kula kulmay Axmed Ducaale Xaaf, iyo Sheekh Maxamed Shaakir. sidoo kale wasiirka ayaa kulan gaar ah la qaatay Axmed Ducaale Xaaf.

Wasiirka ayaa Madaxdii uu la kulmay u gudbiyey fariin kuu waday Madaxda sare ee Dowladda Dhexe, fariintaas oo aheyd in Galmudug ay doorasho gasho bisha July 2019.  ilo ku dhow Madaxtooyada Dhuusamareeb ayaa inoo xaqiijiyey in ay Xaaf iyo Shaakir ka biyo diideen soojeedintii wasiirka.

Sidoo kale Wasiir Sabriye ayaa kulan 4 saacadood qaatay la yeeshay Hogaamiyaha Ahlu sunna Waljamaaca Macalin Maxamuud Sheekh Xasan, kulankan ayaa ka dhacay guriga Macalin Maxamuud, waana kulankii ugu waqtiga dheeraa, waxaana saraakiil ku dhow inoo sheegeen inuu  kusoo dhamaaday natiijo la’aan.

Intaas kadib wasiirka ayaa 6:00 maqribnimo loo galibiyey guriga uu ka dagay Magaalada Dhuusamareeb, waxaana suurtagal ah in kulamo kale Caawo ay isugu soo laabtaan labada dhinac. Sidoo kale Wasiir Sabriye ayaa isku dayaya in meel dhexe la isugu yimaado.

Wasiirka ayaa sidoo kale waxaa qorshihiisa ku jirtay inuu tago Degmada Xeraale oo dhawaan dagaal ka dhacay, inkastoo warar soo baxaya ay sheegayaan in Madaxda Ahlu sunna ay ka biyo diideen in Wasiirku booqdo Xeraale.

Khilaafka Madaxda Galmudug ayaan la saadaalin karin halka uu ku dhamaan doono, waxaana Madaxda Galmudug Dhuusamareeb doonayaan muddo kororsi, halka Dowladda Dhexe iyo Garabka Cadaado ay doonayaan in bisha July 2019 doorasho barlamaan iyo Madaxweyne la qabto.

 

 

 

1 thought on “Maxaa kasoo baxay kulamadii Dhuusamareeb?

  1. Aragti: Wasiirka arrimaha gudaha uma muuqan madax sare oo kasocda dowladda dhexe, waxay ila tahay in Eng. Sabriye uu ahaa dhexdhexaadiye aan awood arrimo gudo lahayn, halka R/W Kheyre uu noqday mid farriimo kaliya u dhiiba wasiirada oo aan u madax baneyn shaqadooda wasiirnimo. Galmudug khilaafkeeda waxay ila tahay inay u baahan tahay go’aan ka gaaris dowladda dhexe taas oo gacanta ugu sareysa yeelaneyso wasaaradda arrimaha gudaha, nasiib darro wasaaraddu ma ahan mid maanta go’aan ka gaari karta siyaasadda hadda (2017-2020) oo ku saleysan “iga war sug” oo noqo wasiirka wasaaradan go’aamadana ilasoo wadaag.

    Ugu danbeyn, dowladda dhexe waxaan farriin uga dhigeynaa wax ay u jeedo oo waxka qabashadeeduna fududdahay. Umadda Galmudug heshiis bey doonayaan iyo inay wax la qeybsadaan maamulada dalka, mashaariicda hadda socota waa ineysan u dib dhicin khilaaf iyo kala qeybsanaan.

    Mahadsanidiin.
    -Sharmaarke Hassan

Comments are closed.