Faafaahino ayaa ka soo baxaya dagaal fiidnimadii xalay ka dhacay Degmada Afgooye ee Gobolka Shabellaha Hoose, kadib markii ay Al-Shabaab ay weerareen laba barood oo Ciidamada Dowladdu ku leeyihiin Galbeed magaalada.
Shabaabka weerarka soo qaaday, ayaa la sheegay inay wateen gaadiidka dadweynaha, iyadoo xilligii uu weerarku dhacayayna ay kala daadsanaayeen Ciidamada Dowladda. Shabaabka oo dhowr jiho ka weeraray degmada ayaa sababtay in Ciidamada Dowladda Federaalka ay soo baneeyaan kontoroolkii ay ku sugnaayeen, inkastoo ay dib ugu laabteen markii uu gurmad xoogan soo gaaray.
Dagaalkan, ayaa dhaliyay khasaaro labada dhinac ah iyo weliba dadka rayidka, walow aan faah faahin laga hayn inta uu gaarsiisan yahay khasaaraha labada dhinac, ayaa dhanka kale waxaa la’ogyahay dhimashada laba ruux oo rayid ah oo midi ay haweeney tahay iyo dhaawaca nin oday ah.
Al-Shabaab ayaa kordhiyay weerarada ka dhanka ah Degmada Afgooye, waxaana uu weerarkan noqonaya kiisii saddexaad bishan oo keliya ay ka gaysteen degmadaasi.
