Koobka kubadda cagta adduunka ayaa maanta si rasmi ah u billaabmaya, ayada oo dalka marti-gelinaya ee Russia uu ka hortagi doono dalka Saudi Arabia.
Madaxweyne Vladimir Putin ayaa ka qeyb-galaya munaasabadda furitaanka oo ka dhaceysa garoonka qaada 80,000 qof ee Luzhniki Stadium oo ku yaalla magaalada Moscow.
Russia ayaa waxa ay qabashada koobka adduunka ku bixineysaa 13 bilyan oo dollar, ayada oo kulmada ay ka dhacayaan 11 magaalo oo marti-gelinaya.
Kulmada is-aragga hore ayaa soconaya illaa 28-ka June, halka kuwa is-tuurka ay billaabanayaan 30-ka June. Cayaarta kama dambeysta ah ayaa dhaceysa 15-ka July.
Brazil, France, Spain, Argentina iyo dalka koobka difaacanaya ee Germany ayaa ka mid ah dalalka aadka loogu saadaalinayo inay koobka hantaan.