Wasiir Sabriye: ” Doorashada Galmudug waqtigeeda ayey ku dhaceysaa”

Wararka Galmudug Wararka Maanta

Wasaaradda arrimaha gudaha ee xukuumadda federaalka Soomaaliya ayaa shaacisay mowqifkeeda ku aaddan doorashooyinka Galmudug.

Cabdi Maxamed Sabriye, wasiirka wasaaraddan oo la hadlay Idaacadda VOA-da ayaa sheegay in doorashadaasi ku dhici doonto waqtigii loogu talagalay ee ah bisha July ee sanadkan.

Wuxuu wasiirka sheegay wixii intaa ka horreeya ay ku dedaalayaan sidii loo heshiin lahaa, islamarkaana iyadoo meel laga soo wadajeedo ay doorashada dhici doonto.

Wasiir Sabriye ayaa dhanka kale sheegay in DFS aanay wax farogelin ah ku sameyn doonin arrimaha doorashooyinka, balse ku dedaali doonaan sidii ay doorashada waqtigeeda ugu dhici lahayd.

Madaxweynaha Galmudugta Dhuusamareeb Axmed Ducaalle Geelle (Xaaf) iyo madaxiisa xukuumadda Sheekh Maxamed Shaakir ayaa dhowaan Dhuusamareeb ka sheegay in waqtigooda ku egyahay sanadka 2021.

Dhanka kale Madaxda Galmudugta Cadaado ayaa sheegay in ay dhankooda diyaar u yihiin in la qabto doorashada Galmudug bartamaha Sanadkan.