Garoonka ciyaaraha Cabdullaahi Ciise Magaalada Gaalkacyo xarunta gobolka Mudug ayaa galabta waxaa lagu soo gabangabeeyey koobka degmooyinka Galmudug 2018.
Koobkan ayaa sanadkan waxaa marti galisay Gaalkacyo, waa sanadkii ugu horeeyey ee la qabto, waxaana qaban qaabadiisa iska kaashaday wasaaradda dhalinyarada iyo ciyaaraha Galmudug, Xiriirka Olympic-da Galmudug iyo bulshada Galkacyo.
Koobkan ayaa bilowday 26 August 2018, waxaana ka qeybgalay 5 degmo oo kala ah Gaalkacyo, Cadaado, Hobyo, Cabudwaaq iyo Balanballe. waxaana ka maqnaa Dusmareeb.
Ciyaartii galabta oo aheyd mid xiiso badan ayaa waxaa ka qeybgalay Madaxweyne ku xigeenka Galmudug Maxamed Xaashi, Gudoomiye ku xigeenka 1aad Aqalka Sare BFS Abshir Bukhaari, Taliyihii hore xoogga dalka Cabdi Wali Jaamac Gorod, Wasiiro Galmudug, Xildhibaano, masuuliyiin ka socday degmooyinka Galmudug, iyo qeybaha bulshada. Degmada Gaalkacyo ayaa ku guuleystay koobka Degmooyinka Galmudug Sanadkan 2018, iyadoo ka adkaatay Balanballe.
