Madaxweynaha JF Soomaaliya Mudane Xasan Sheekh Maxamuud ayaa si rasmi ah Muqdisho uga furay shirka Madasha Wadatashiga Qaran, kaas oo ay ka qaybgalayaan Madaxda dowlad gobaleedyada dalka iyo kuwa dowlada federaalka ee Soomaaliya.
Shirkaan ayaa waxaa looga hadlayaa Guulaha laga gaaray Doorashada haatan socota ee maraysa heer gabo gabo ah, iyo waxyaabihii ka hir galay go’aanidii horay ay u gaareen madaxda.
Waxaa shirkan ka qeyb galaya Madaxweyne Xasan Sheekh, Guddoomiye Jawaari, Ra’iisul Wasaare Cumar C/rashiid, Ra’iisul wasaare kuxigeenka, Madaxweynayaasha Koofur Galbeed, Galmudug, Jubbaland, Hirshabeelle iyo Madaxweyne kuxigeenka Puntland.
Guddoomiyaha Guddiga doorashooyinka heer federaal Avv. Cumar Dhagey ayaa kulanka looga dhageystay warbixin ku saabsan doorashooyinka ka dhacay xarumaha maamul goboleedyada, cabashooyin laga keenay meelaha qaar ee doorashada ka dhaceen iyo xaqiijinta qoondada
Madaxweyne Xasan Sheekh Maxamuud oo ka hadlayay furitaanka shirka ayaa ku bogaadiyay Maamulada Jubbaland iyo Koofur Galbeed, dhameystirka doorashada xildhibaanada Aqalka Hoose, isagoo maamulada kale ugu baaqay inay dhameystiraan.
Ergeyga Qaramada Midoobey Micheal Keating ayaa canaan u jeediyay Madaxda Madasha, sida ay ugu gaabiyeen Hirgelinta Hiigsiga Soomaaliya ee sanadka 2016 oo aheyd in sanadkan gudaheed la qabto doorashada Madaxweynaha iyo tan Guddoonka Baarlamaanka oo saddex jeer dib u dhac ku yimid.
