Madaxweynaha dowlad goboleedka Galmudug Axmed Ducaalle Geelle Xaaf ayaa maanta markii ugu horeysay shir gudoomiyey shirka golaha wasiirada Galmudug, Golaha wasiirada ayaanan yeelan wax kulan muddo dhowr bilood ah, waxaana Galmudug ilaa Janaayo 2017 ku jirtay qalalaase siyaasadeed, kaas oo ay hadda ka soo kabaneyso.
Shirka ayaa sidoo kale waxaa ka qeyb galay Madaxweyne ku xigeenka Galmudug Maxamed Xaashi, Golaha ayaa ka dhagaystay qaar ka mid wasiirada warbixino. arimaha ugu muhiimsan ee laga hadlay ayaa aheyd raadka abaaraha iyo roob yari ka jirta deegaanada Galmudug, Amniga iyo arimaha Bulshada.
Sidoo kale Waxaa shirka kasoo dhex muuqday wasiiro muddo sanad ku dhow ka maqnaa deegaanka, dhanka kale Madaxweyne Xaaf ayaa todobaadka ku amray dhammaan Madaxda Galmudug ee horey u daganaa xarunta Madaxtooyada in ay dagaan meelo kale, isagoo sheegay in Madaxtooyada loogu talagalay kaliya in ay noqoto goob shaqo. arintaan ayaa ah hadal heynta Magaalada Cadaado fadhiga dowlad goboleedka Galmudug.
